എന്തോ ഒന്നു,
ഒരു പാമ്പിനെ ഓര്‍മിപ്പിക്കുന്നത്‌
വിഷയാസക്തിപോല്‍ വഴുവഴുപ്പുള്ളത്
മനസ്സിലൂടെ മേലോട്ട് കയറി
കണ്ണുകളില്‍ കത്തിയ ഒരു സൂചന
പഴമെന്നു കരുതി കൊത്തിയെടുത്തു
വേഗത്തില്‍ ഇഴഞ്ഞു പുറത്തു കടന്നു
ഉമ്മറവും മുറ്റവും താണ്ടി
വേലിപ്പഴുതിലൂടെ അപ്രത്യക്ഷമായി
അടുത്തവീട്ടിലെ ശാന്ത എവിടെനിന്നോ
ഒരു പഴവും കടിച്ചുകൊണ്ട്
വേലിക്കപ്പുറത്ത്‌ നിന്നു
നാണിച്ചെന്നപോല്‍
മുഖംകുനിച്ചു ചിരിച്ചു.
---------
അരാജകത്വം കൊടികുത്തി വാഴും നാട്ടില്‍
കാല്‍നടക്കാരന്‍ മാത്രം
റോഡിനു ഇടതുവശം ചേര്‍ന്നേ നടക്കാവു!
----------
അക്കാദമീയം
പണ്ടെന്നോ ആനപ്പുറത്ത് കയറിയ
തഴമ്പില്‍ തലോടി എഴുത്തുകാരന്‍ മൊഴിഞ്ഞു,
"അക്കാദമീയം മഹാശ്ചര്യം; കിരീടം വേറെയും കിട്ടുമോ
പുണൃവാളനെ ഇനിയും തള്ളിപറയുകില്‍!"
-------
നല്ലോണം എഴുതിത്തെളിഞ്ഞൊരു.
'കുഞ്ഞുണ്ണി'യാകാന്‍ മോഹിച്ചതാണ് ഞാന്‍;
തെളിയാത്തെഴുത്തില്‍ കാല്‍തെന്നിവീണൊരു,
'മണ്ണുണ്ണി'യാകാനാണെന്‍ നിയോഗം.
--------
